បន្ទាយមានជ័យ៖ កងកម្លាំងទាំង៣ប្រភេទ ចុះហ្វឹកហាត់ រៀនបើកបរទូកកាណូត ជាក់ស្តែង ដើម្បីត្រៀមជួយសង្គ្រោះប្រជាពលរដ្ឋ នៅក្នុងរដូវទឹកជំនន់ ដែលតែងតែកើតមានជារៀងរាល់ឆ្នាំ។

ការចុះហ្វឹកហាត់នេះដឹកនាំដោយលោក ហ៊ឹល រ៉ាយ៉ា ប្រធានគណបញ្ជាការឯកភាពក្រុង ដែលមានការចូលរួមប៉ូលិស អាវុធហត្ថ និងទាហាន ប្រមាណជិត៥០នាក់ ធ្វើឡើងនៅអាងម្កាក់ ស្ថិតនៅ សង្កាត់ម្កាក់ ក្រុងសិរីសោភ័ណ នៅរសៀលថ្ងៃទី១៥ ខែកញ្ញា ឆ្នាំ២០២១។

ការហ្វឹកហាត់ ដើម្បីត្រៀមជួយសង្គ្រោះប្រជាពលរដ្ឋក្នុងករណីចាំបាច់ នៅក្នុងរដូវទឹកជំនន់ ដែលអាចនឹងមកមកដល់ក្នុងពេលដ៏ខ្លីខាងមុខនេះ។

លោកលោក ហ៊ឹល រ៉ាយ៉ា ប្រាប់ EAC News ថាការហ្វឹកហាត់នេះធ្វើឡើងដោយផ្តោតសំខាន់ បង្រៀនលើការគ្រប់គ្រងទូកការណូត ការរៀនបើក ឲ្យបានស្ទាត់ និងបន្តបង្ហាត់ពីរបៀបជួយសង្គ្រោះពលរដ្ឋ ក្នុងពេលជួបគ្រោះធម្មជាតិទឹកជំនន់។

លោកបានបញ្ជាក់ថា ក្នុងការចុះបង្ហាត់បង្រៀនដល់កងកម្លាំងនេះ ធ្វើឡើងតាមការ ណែនាំពីអភិបាលខេត្តលោក អ៊ុ រាត្រី ដែលបានបញ្ជាឱ្យកងកម្លាំងត្រៀម ជួយសង្គ្រោះពលរដ្ឋដែលរងគ្រោះដោយទឹកជំនន់ ដោយបទពិសោធន៍ឆ្នាំ២០២០កន្លងទៅ ក្រុងសិរីសោភ័ណ ក៏ជាក្រុងមួយ ដែលរងគ្រោះខ្លាំងដោយសារតែជំនន់ទឹកភ្លៀង ធ្លាក់មកពីប្រទេសថៃ បន្ទាប់ពីស្រុកមង្គលបូរី៕